قصائد إلى الملا باسم الكربلائي بقلم الاسطورة الإمبراطور

سلامون عليكم
قصائد إلى الملا باسم الكربلائي بقلم الاسطورة الإمبراطور الأديب الشاعر جابر الكاظمي حفظهم الله بحق صاحب العصر الزمان :
1- تحجي لك الزوار

تحچي لك الزوار ناشدها ناشدها - يتلالى بالأنوار مرقدها مرقدها
طفلة رقية - صبح ومسية - جنة وزهية
مرقدها مرقدها

يالمعتني وتريد - تاخذ جواب يفيد - إسمع خبرها
لعيونك من بعيد - عنها بصراحة يشيد - يشهد گبرها
لو رايد التوكيد - عن علة التمجيد - لوعة لگدرها
وين الأمير يزيد - وإلي بمكرها تكيد - ضايع أثرها
غي رالحقد آثار ما عدها ما عدها - ما نالت الأشرار مگصدها مگصدها
يا أهل الجريمة - شوفوا اليتيمة - بهيبة عظيمة
مرقدها مرقدها

يالإلك حاجة وجاي - بلهفة گلب عناي - صادق مرامة
هاي الوجيهة هاي - وعندها الدوى لكل داي - إلها كرامة
ليها إعتني شچاي - وإلمختلف بالراي - إترك كلامه
صيح بعهد وفاي - مولاتي يا رجواي - يوم القيامة
عندك علم وأخبار عن جدها عن جدها - وبمنزل الأطهار مولدها مولدها
متورثة ذاته - وسيرة حياته - تشهد صفاته
مرقدها مرقدها

لا تعقد التفكير - طفلة وعمرها زغير - تجهل فضلها
لو تمتلك تدبير - عندك يقين يصير - تدرك مثلها
من الله هالتقدير - إلهم زغير چبير - تقدير أهلها
لا تصطدم وتحير - هالعبرة للتذكير - الله جعلها
وبقدرته الجبار أيدها أيدها - لأهل الوعي تذكار خلدها خلدها
هاي الحقيقة - للضل طريقه - أكبر وثيقة
مرقدها مرقدها

يالتسمع أنظر زين - هاي الكرامة منيم - نالت علاها
طفلة وهضمها البين - وين أهلي صاحت وين - رفعت نداها
غمضت جفن العين - شافت أبوها حسين - بالطيف إجاها
من صفگت الچفين - والدمع عالخدين - وإشتد بچاها
زين العباد إحتار شاهدها شاهدها - تبچي وتريد إحضار والدها والدها
الدمعة تصبها - يلهب گلبها - وأصبح طلبها
مرقدها مرقدها

ولن الأبو المذبوح - بالطشت راسه يلوح - فگدت أملها
وبگلب كله جروح - شبگته ولنها تنوح - الدمعة تهلها
طفلة بنظر مشبوح - من عگبه وين تروح - تشكي عللها
لنها بجسد مطروح - غربت عنه الروح - گرب أجلها
لو شاءت الأقدار شيردها شيردها - بالغربة لمن صار مرقدها مرقدها
الباري بحسابه - خلى الخرابة - سر الغرابة
مرقدها مرقدها

2- جمال الكون من شريط ياعلي

جمال الكون بشفافك - الگلب مفتون بأوصافك
سحر معناك - إندفن وياك
يا حيدر

بدر علياك من يظهر
ضوى الأكوان - يظل خجلان
بحجاب الغيظ يتستر
أوصفك بيش ما أقدر
الوصف هيهات - يوصف ذات
بضوى الخلاق تتنور
عمد للكون يا محور
وجودك صار - أخو المختار
وأبو الأطهار يا أطهر
بشذاك الطيب يتعطر
علينه فاح - حيا الأرواح
بدر لولاك ما أزهر
مطالع نور من وجهك - بشر بالكون ما يشبهك
ولحن نجواك - إندفن وياك
يا حيدر

المفاتن بيك تتجسم
سحر ينساب - من الأهداب
بشذى التقديس يتنسم
يظل معناك سر مبهم
بجبين اللوح - سناك يلوح
على التكوين يتقسم
حدر جفنيك يتنعم
بحسن مضمور - خمايل نور
بلحن طرواك تتنعم
جبينك نور يتزاحم
يا بو السبطين - سواد العين
شبيه الليل لو عتم
بصدى العشاگ ناديتك - فرض عالناس قدسيتك
جمالك ذاك - إندفن وياك
يا حيدر

إلك إشعاع ظل يمتد
إلك أسرار - يا حامي الجار
لعقول الناس ما تمحد
لوجودك دوم نتودد
إذا مصباح - لفانه ولاح
المحاسن بيك تتجدد
بهواك أرواح تتنهد
معاني الشوگ - عليك تلوگ
يا روح الروح يا أوحد
إله الكون خل يشهد
رفعنه الصوت - على حد الموت
نآمن بيك ما نرتد
حلى الإيمان بوجودك - بحور تفيض من جودك
كرم يمناك - إندفن وياك
يا حيدر

يا أصل الطيب والمنبع
إلك أوصاف - البشر ما شاف
مثل معناك يا الأنزع
شمس لولاك ما تسطع
ولا أفلاك - جرت لولاك
بهائك نور يتوزع
عجيبة شلون بالمضجع
تظل مدفون - ويظل هالكون
عليك يجود بالمدمع
عليك العين ما تهجع
سهر وهموم - دمعها دموم
جمر فرگاك يتلفع
لهيب الروح يتوجر - الدمع بركان يتفجر
وأمل دنياك - إندفن وياك
يا حيدر

يا بحر الجود وإحسانه ما نشفاك
أهيم بعالم أوصافك من أشفاك
جمال الكون تكوينه من شفاك
والفردوس من وجهك زهية

3- كل ما نوقف بالمحراب من شريط الرزايا

كل ما نوگف بمحراب - نذكر نورك إلي غاب
والأنظار - تجدح نار - لأجل الثار
يا كرار حيدر

يا حيدر شيعتك إحنه نصيح بلهفة وبحسرة
مواگد بينه تتسجر إلك يا والد العترة
بينه طبرتك تركت ألف طعنة وألف جمرة
وثارك يستعر بينه مثل ما تسعر الجمرة
إحنه شيعتك ننعاك - يا ريت إندفنه وياك
بحزن الروح - دمع النوح - ظل مسفوح
ليل نهار حيدر

بكل محراب من نوگف نذكر لوعة مصابك
ونذكر من طحت دامي وعليك ينوح محرابك
نكابر عالحزن ونصيح يا من صار الدمه خضابك
منهو إلمسح دم راسك ومنهو إلضمد صوابك
وبهالطبرة يا ضرغام - طبروا هامة الإسلام
عين الكون - تغفى شلون - يا المرهون
للأقدار حيدر

غبار الفاجعة تناثر حزن والعالم تغبر
حزين وبالسمى السابع هتف صوت الوحي وكبر
سمعنه الهاتف ينادي إنطبر راس الوصي حيدر
عجيبة تموت يا فارس بدر والخندق وخيبر
وشلون الأجل أرداك - يا سيف النبي الفتاك
كلها تگول - مو معقول - هالمچتول
حامي الجار حيدر

إنت الغالي يا أول إمام وشيعتك إحنه
مصابك عايش ويانه ولا لحظة يبارحنه
بعد منهو الذي يبدد هضمنه بشدة لو طحنه
مثل نوح الثكالة تنوح مهجنه وبالحزن صحنه
لا هب النسيم إلهاب - من بعدك يا داحي الباب
يومك يوم - كله هموم - بينه تدوم
هالأكدار حيدر

على فراگك سكن بينه الكدر وهموم لوعتنه
سواد الليل ظل ينعى ويواسينه بمصيبتنه
جمر تنثر نواظرنه عليك بدال دمعتنا
مثل دم جرحك إليجري غدت دم تجري عبرتنه
وشلون الجفن أخفاك - وتراب الگبر واراك
نحني ضلوع - نجري دموع - چم مفجوع
ظل محتار حيدر

يمن رب العرض حجة وخليفة للنبي إختارك
مشاعل فگدك إستعرت ولا تخمد بعد نارك
بواتر هذه مشحوذة يمن قائدها بتارك
لون هالدنيا نفنيها فلا نوفي طلب ثارك
دمك يا دمه يساويه - ويا ثار الذي يجازيه
ما ساواه - لا والله - ما ننساه
مهما صار حيدر

ثارك عايش ويانه يصبحنه ويمسينه
ومن يسفر شهر رمضان يذكرنه بمآسينه
نصوم ونذكر صيامك إلما تمم ثلاثينه
يا ليلة واحد وعشرين ذوت نار الحزن بينه
كل ما نصطحف آيات - ويانه تهل عبرات
بالأحزان - والأشجان - ثارك حان
يا مغوار حيدر

4 - آنه زينب يالعفتني من شريط الرزايا

آنه زينب يل عفتني - بويه عگبك يتمتني
شحسبت من ودعتني

يا علي آنه العقيلة بالمصايب دمعي جاري
من غبت عني يا حيدر طول عليك إنتظاري
سابحة عيوني على دربك وأنتظر ليلي ونهاري
بگلبي ناري بعيني دمعي ومزجت دمعي ويا ناري
بالنوايب هيمتني - للمصايب سلمتني
شحسبت من ودعتني

بالأمس يا بويه روحي تصوبت بمصيبة أمي
اليوم صوبني زماني بفرگتك وإزداد همي
صرت يا بويه يتيمة والمصايب كلها يمي
هجمت أشباح المناية وهدمت حيلي ويا عزمي
بالمصيبة صدعتني - بويه لمن ضيعتني
شحسبت من ودعتني

يا علي وچلمة أبوة چنه نسمع من لسانك
والزمان حرمنه منها وسفة يل خانك زمانك
لچن الحال إلفجعني من شفت خالي مچانك
عرفت يا بويه حرمتني العاطفة ولهفة حنانك
بلوعة الهم لوعتني - وبمغيبك خيبتني
وشحسبت من ودعتني

راحت أيام المعزة وگابلت سود الليالي
أذكر أيامي إلعشتها بعطفك وعزة دلالي
تالي لن دارك شفتها وحشة والمحراب خالي
هذا لا واقع أگوله ولا أحسبه من خيالي
هيجتني وسهرتني - بالمصايب صوبتني

يا علي ودعتك الله يا فخر تاج الغوالب
توسد بگبرك يا بويه وآنه أبگىويا النوايب
ليلة فراگك رهيبة يل صرت عن عيني غايب
تحيرت مدري أجابل لو أسلم للمصايب
تلوعت يل دوهنتني - وإنت وحدك روعتني
وشحسبت من ودعتني

5 - مجروح قلب المختار من شريط الرزايا

يصب دمعي ولا ينشف مصبه
دليلي غير سهم الهم ما صابه
أنوح على الحسن وأذكر مصابه
وأضمد بالدمع ناري السرية

مجروح گلب المختار - ويسيل دمع الكرار
والزهرة تبچي دموم - تنحب على المسموم

ملامح للحزن ظهرت تلوج بكل جفن عبرة
على مصاب الحسن هاليوم ينوح العالم بأسره
مصيبة وتبدي من جبريل لرسول الله أبو العترة
لروح المرتضى الكرار لمهجة فاطمة الزهرة
هاليوم يوم الأحزان - وتنوح كل الأكوان
والدنيا كلها هموم - تنحب على المسموم

عصف ريح والهم غبار الظيم يتنثر
ظلام يغطي دنيانه إنعكس وتبدل المظهر
إنفطر چبد الحسن لچن چبد النبي تفطر
رسول الله إنخطف وجهه بمصيبة شبله وتغير
ما بين لوعات الروح - ما بين گلبه المجروح
روح النبوة تحوم - تنحب على المسموم

من كل جانب ومن كل صوب صريخ النايبة تسمع
لهيب المحنة يتواگد بصميم الفارس الأنزع
مو چبد الحسن هذا چبد المرتضى تگطع
ومو دم چبدته إليجري جفن حيدر جرى المدمع
أمواج ظيم وعبرات - وتسيل فوگ الوجنات
بيها الحزن مرسوم - تنحب على المسموم

مصيبة وفجعت الزهرة وغدت تجري المدامع دم
إجن يمها إليواسنها حوا وهاجر ومريم
مصاب الحسن ذكرها بضلعها لمن تهشم
مثل چبد الحسن أمه چبدها الطاهر تخذم
هاليوم صارن كسرين - بالروح شبت نارين
هاي أم ضلع مهشوم - تنحب على المسموم

بمشارف يثرب الليلة طلع ناعي الحزن ينعى
وإجتمعوا رسول الله وعلي والطاهرة البضعة
وبدار الوحي هاليوم كل الرسل مجتمعة
ولا ينسمع منهم صوت غير الشهگة والدمعة
آلام تتبع آلام - ونشوف سود الأعلام
كل الرسل هاليوم - تنحب على المسموم

توجه سيد الأكوان للزهرة ويصد ليها
على مصاب الحسن صارت تواسيه ويواسيها
إلتفتوا لن علي وياهم مدامع ظيم يجريها
وكل منهم غدى بگلبه سعير الجمرة يخفيها
جبريل ينظر هالحال - ويسيل دمعه الهمال
كل دمعة منه هموم - تنحب على المسموم

أشد ما عالنبي وأعظم مصيبة إلخلفت آلام
من شاف الحسن نعشه تحيطه زمرة الظلام
ما شايف نعش گبله يتولوه العدى بسهام
هذه حالة الدنيا وهذه غدرة الأيام
مسموم بحر الإحسان - والكون نوح وأشجان
كل ثاكلة ومحروم - تنحب على المسموم

6 - الرأس المقطوع من شريط نوح ودمع

الرأس المقطوع - في رمحٍ مرفوع
بلا ذنبِ - قضى نحبي
الرأس المقطوع

يا أبو الحملة هاليلة من جوف النحر أروي لك أخبار
چنِت يمي ريتك يا بوية بكربلاء و تعاين اشصار
إلك أبدي و أشرح مصاب اللي سِدَر يا حامي الجار
صرت وحدي و انتهت بالطف يا علي أهلي و الأنصار
جيشٌ كالأشباح - جاءوا بالأرماح
لدى الحربِ - قضى نحبي
الرأس المقطوع

بأشد حالة بالخيمة ودعت الحَرَم من بعد الأطفال
رحت آييس أتعثر بهمي و مصابي و قسوة الحال
شفت عسكر داروا عَلَي من كل كِتِر أشباه الرجال
بجمع حاشد متشرعة رماح الحَتِف و سيوف الآجال
جاءت مثل السيل - أمواجٌ من خيل
و بالضربِ - قضى نحبي
الرأس المقطوع

الحرب دارت و استوحدوني من بعد أهلي يا ضرغام
انفُضخ راسي بذاك الحجر يا أبا الحسن وتصوب الهام
نزف دمي و على الجسم مثل المطر تتهدف سهام
و المثلث گطَّع دليلي و كابدت بالرمية آلام
ذا سهمُ الأوثان - في قلب القرآن
رمى قلبي - قضى نحبي
الرأس المقطوع

وگع جسمي بالمصرع و من عالبُعُد تترقب الناس
گرب موتي و آنةه أعالج عالأرق وبآخر أنفاس
الشمر جاني ثنّى على صدري بركبته و على الصدر داس
لِزَم شيبي و ابتدى يحِز نحري وفصل عن جثتي الراس
رأسي في العسّال - جسمي فوق رمال
على الترب - قضى نحبي
الرأس المقطوع

إنگطع نحري راسي إنحمل فوگ الرمح ويگطر دموم
و عقب چتلي ظل جسمي مرمي على الترب وتحاوطه الگوم
بحوافرها داست علي خيل العدى ولن صدري مهشوم
و على المذبح مو دم نزف من رگبتي تتنازف دموم
ملقاً في البيداء - ظامٍ جنب الماء
وبالخطب - قضى نحبي
الرأس المقطوع
7- هاي امي لربتني من شريط نوح ودمع

هاي أمي إلربتني - ولهذا الموقف رادتني
بالمدمع نادتني - وياك أستشهد وصتني
حان الموعد - خل أستشهد

هذي مفاوس كربلا و هاي الحرب يا عمي
هذي وصية والدي وشجعتني نخوة أمي
مهموم و ادري التضحية تكشف سحابة همي
تتناثر أزهار الفرح حين يتناثر جسمي
مو وگت شمعة و لا عرس وگت إنتصاري و عزمي
وأمضت الصارم شمعتي و الحنة تصبح دمي
من أوگع بالمصرع - أوفي كل حگوگ المرضع
و لأمي إلرضعتني - وياك أستشهد و صتني
حان الموعد - خل استشهد

خيل و زِلِم من كل كتر وسط الحرب مجموعة
وادم إجت للمعركة لأتعس هدف مدفوعة
بيض الهنادي ملوَّحة هاي السُمُر مشروعة
يا عمي إرخصني اطب و أخمد سعير اللوعة
هالساعة مو ساعة شمع للعرس طفوا شموعه
چفن أمي عاهد لو متت يحبس مسيل دموعه
و الواعي بتفكيره - يتمسك بأعراف الغيرة
و الغيرة دفعتني - وياك أستشهد و صتني
حان الموعد - خل أستشهد

يا حسين يا عمي و أظن ترخصني لو ردت أطلع
هزَّتني لأجلك غيرتي و للذبح نحري تتطوع
لهالساعة ذاخرني الحسن هذه و صيته و تسمع
ناداني لو عمك يظل وحدة و يشع المفزع
ضحي له يبني برگبتك و عن مبدأك لا ترجع
واعدني يحضر والدي لو طحت وسط المصرع
عاهدته و عاهدني - أبرز و بعينه يشاهدني
و عهوده إلشجعتني - و ياك أستشهد وصتني
حان الموعد - خل أستشهد

يا حسين يا عمي و بعد شنتظر شنهو التالي
وحديتك بالطف هدَّمت حيلي و تغيَّر حالي
خليني أبرز للوغى و يسفر شعاع هلالي
و لو مانعتني من الحرب تصدع ركن آمالي
شلون أصبر و شبلك علي طايح صريع گبالي
دم إبنك ارخصته شتظن دم إبن أخوك الغالي
خل أبرز للعسكر - آخذ منهم ثار الأكبر
و الحالة إلهضمتني - وياك استشهد وصتني
حان الموعد - خل أستشهد

جاوبه حسين بدمعته غيِّر يا جاسم فكرك
بعدك بزهرة دنيتك شنهو إلشِفِت من عمرك
بأول شبابك مارِدِت كربلاء تغِّيب بدرك
بيك أنظر أوصاف الحسن لمَّن عيوني تنظرك
منهو إليصبر الوالدة لو شاهدت دم نحرك
شلون أرجع لخيامي - و الأكبر طايح قدامي
و أمي إلي بعثتني - وياك أستشهد و صتني
حان الموعد - خل أستشهد

جاوبه جاسم يالگلت أگصد يا جاسم لأمك
هي إلدعتني لنصرتك گالت لي أنصر عمك
گالت يا جاسم لا ترد خوض المناية بعزمك
خليني أنظر بالحرب يم جسم الأكبر جسمك
و گالت لي روح لفاطمة صوغة إخذ من دمك
و الزهرة من دار الخِلِد ظلت تردد بإسمك
عالمذبح دلتني - وياك استشهد و صتني
حان الموعد - خل أستشهد

8- حضر بالطف من شريط نوح ودمع

حضر بالطف رسول الله وتحير - فگد جاسم أشد لو فگد الأكبر
يدير العين هادينه - فگد بدرين هادينه
فگد جاسم أشد لو فگد الأكبر

حضر بالفاجعة الهادي - حزين بلوعته ينادي
إجيت أرد أحضر أولادي - وگعد بين الجثث ينحب
تفجر سيل عبراته - حفر بدموعه وجناته
زفير النار حسراته - ضميره بالحزن يلهب
گعد للأكبر ينظره - يشوف بهامته الطبرة
ويصد لجاسم بعبرة - يشوفه بالدمه مخضب
يحاچيهم وهم عالغبرة صرعى - غدى عليهم دمعة على دمعة
يتوجه وين هادينه - فگد بدرين هادينه

حضن جثة علي الأكبر - يگله يبني ما أگدر
أشوفك بالدمه معفر - دهتني مصيبتك يا بني
كلف يا الأكبر مصابك - صريع وبالدمه خضابك
يمينه إنشلت إلصابك - تراه بگلبي صوبني
من أشوفن وجهك الدامي - تهيج لوعة آلامي
شباب وتنذبح ظامي - شعلامك ما تجاوبني
حنى ضلوعه ويشم طبرة جبينه - يذوب الصخرة من جمرة ونينه
ولاه البين هادينه - فگد بدرين هادينه

گعد يم جاسم يشمه - حنى ضلوع الصبر يمه
ويخضب شيبته بدمه - يگله يا بني يا جاسم
إجيت أمسح ترب خدك - وأضمد بالدمع چبدك
شجرى لك يا بعد جدك - يا ريحانة بني هاشم
يا ضي إلبيه تصد عيني - على دربي يدليني
شجرى لك ما تحاچيني - وتنشف مدمعي الساچم
تغض وسفة يا جاسم عن جوابي - يعل لأجلك جرح لوعة مصابي
حمل جرحين هادينه - فگد بدرين هادينه

إلتفت للأكبر بونه - شطر مجرى الدمع منه
يگله بيش اهيدنه - جرح چبدي إليسافح دم
وإنت يا علي يمي - أشوفنك جسم مرمي
يصب من منحرك دمي - مو هو جسمي الذي تخذم
يا نجمة من السمه طاحت - يا دمعة من الجفن ساحت
شكثر روحي إلك ناحت - وما تسمع بواچي الهم
سهم فگدك شعب گلبي ورماني - حزن جاسم مثل حزنك دهاني
إنرمى بسهمين هادينه - فگد بدرينه هادينه

يا جاسم يا هوى إليسري - شفت دم رگبتك يجري
توجيت بجبل صبري - يا ضي عيني إلأصد بيها
لزفافك جيت يا عيدي - جبت لك شمعتك بيدي
بعد ما أدري يا وليدي - هوى العاصف يطفيها
علگتها بجمرة الدمعة - شلتها بروح منفجعة
يا جاسم گوم هالشمعة - على گبر الحسن خليها
يمن فگدك عصف ريح المصايب - سواج الهم طفح غيض النوايب
إنفجع بإثنين هادينه - فگد بدرين هادينه

إلتفت للأكبر يگله - عليك الحزن ما أمله
البيابي مدمع تهله - على أبوك إلي بگى وحده
أبوك حسين يا الأكبر - وحيد وحاطته العسكر
رعاك الله لون تگدر - تگوم العسكر ترده
من اشوفنه يهب نوحي - ويهيج ساكن جروحي
يا الأكبر هاك إخذ روحي - وأنهض للعزم شده
النبوة إنصابت لحال الإمامة - مصيبة والفلك غير نظامه
حزن لحسين هادينه - فگد بدرين هادينه

على جاسم روحه مهمومة - گعد يتمثل رسومه
يگله دونك الحومة - يا ريتك تنظر وتسمع
وتگوم لعمك تشوفه - عليه الجيش بصفوفه
هجم وملوح سيوفه - وعليه رماح تتشرع
وسف يخفي الأجل ونك - جواب أرجى صرت منك
أظن يا بن الحسن چنك - هنت لك نومة المصرع
يمن عرسك صبح عرس المنية - إلك طابت رمال الغاضرية
إله مصابين هادينه - فگد بدرين هادينه

تسلم اخووووووي

القلاف
وننتظر جديدك
عاشق باسم

فنكيوو سوو مااج خيي عالقصاائد ،،

يعطيكــ العافية ،، موفق ،، و للأمام دوماً

مشكوورين على المرووور